去完日全食都差唔多三個星期，相大部份整好，dv  都有好多未剪好，手信有d  都仲未俾人，借番黎d鏡亦未還俾人。雖然一切都進行得好慢，但依然想寫低成個旅程既點滴分享一下。

其實去睇既念頭來自上年畢業，當時我同上莊阿cash 講起畢業後得閒一齊去睇星，然後cash提出下年一齊去睇日全食，一來可以當旅行，二來可以去睇星睇銀河，仲可以睇到人生第一次的日全食。我果時覺得好吸引，不過都係應承住先，心想到時先算，冇諗到日後真係會去得成。

之後過左大半年，有日子樂打電話講佢計劃緊去睇日全食，問我有冇興趣參加，我突然靈光一閃，想起半年前的那個約會，我立即打電話俾cash，好彩佢仲記得，亦好快應承去。之後我同子槳仲揾左幾個，包括thomas, 阿誠, 同埋阿恒。人雖然揾齊，但係對於成個行程點搞，食、住、行都依然茫無頭緖，為此我地特登開左幾次會，但都進展不大，正當大家有d想放棄的時候，阿誠得知"香天" 有搞日食團，地點為新疆哈密伊吾葦子峽，提議我地參加，當然係一致通過啦。

搞掂行程問題，但依然有一大埋問題要解決:機票、公司假期、個人物品、選擇各式天文儀器、儀器包裝及運輸、旅費、意外保險.......其中以報關方面最煩，因為日子臨近奧運，加上我們d"重型"架生容易令人產生誤會，特此香天同我地又開左幾次會，嘗試對出入各通道有可能出垷的情況提出相應的應付方法。好好彩所有野都可以晌去之前解決晒，我亦可以開始向哈密日全食之旅出發。

再續

聽日就上深圳住一晚，準備第二日搭早機去新疆，祝我好運吧～～

I'm bringing Xanga back - drop a comment if you're with me!